行程 : 東京➡️妙高杉ノ原➡️赤倉溫泉➡️長野➡️東京

一年一度滑雪行程出世了，今次去妙高杉ノ原 + 赤倉溫泉滑雪場呢到被喻為初學者天堂!!!!
今次有3個人去，所有野都很簡單, 再簡單啲講，一落機搭NEX去東京轉新幹線到上越妙高, 再轉巴士到雪場, 滑幾日雪之後就回頭路返成田搭飛機走人………不過係咪真係咁簡單呢?!睇埋落去就會清楚喇.

1. 團員3個
2. 機票已訂
3. JR東日本鐵路周遊券 (長野、新潟地區) (任意選擇5天使用)(8~14號)
4. 杉ノ原スキー場酒店已選 空飛ブウサギ (已book Booking.com) (可free Cancel, 去到畀錢)
5. 赤倉温泉スキー場酒店已選 赤倉溫泉 太閣 (已book Agoda.com) (可free Cancel, 去到畀錢)
6. 池袋酒店已選 the b tokyo ikebukuro (已book booking.com) (可free Cancel, 去到畀錢)

雖然簡單，不過都要講下個行程先，今次團友決定得比較突然同埋話想只專注滑雪喎，唔會好似上年咁周圍去架喇囉喎。

今次只有三個星期時間安排，不過好彩地今次只去妙高杉ノ原スキー場 同埋 赤倉温泉スキー場，相對地簡單。

不過咁遲安排既問題就係杉之原好少少既民宿都無晒LU，赤倉嗰邊好啲，仲有太閣可以BOOK……(個人強烈建議攪滑雪行程最好早半年就要開始攪喇)。

季尾去滑雪，一定要留意有啲雪季先有既交通有可能已經停駛，記得睇清楚，如果唔係就GG喇。

8 Mar 2019
香港出發，到成田機場記住去counter攞埋JR Pass先好去坐NEX，但係有個問題就係個JR Service Counter 要08:15先開門，團友要等到開門先攞到pass。跟住坐08:50 NEX 6號去東京站, 到站時間大約9:53。
之後坐11:24北陸新幹線出發去上越妙高站 (如果可以搭早一班車，就早一班，因為後面就知咩事)，到達時間係13:16，之但係入杉ノ原スキー場架妙高高原Liner(頸南BUS)巴士係13:35開走，所以團友們揸緊時間搭車啊(架車走咗要等2個鐘架)!!!!!，到達雪場時間大約14:42，剛剛好可以Check in上房。詳細交通可睇呢到

8 ~ 10 Mar 2019
如果團友們經過通頂飛機再加幾個鐘頭車而仲有體力既話，快啲換衫去滑雪喇! 不過都可以選擇訓個靚覺既, 因為嚟緊兩日都喺依個杉之原滑雪場呢，至於晚餐問題呢…….必須要喺民宿食，因為附近無餐廳可選擇。

10 ~ 13 Mar 2019
10號朝早，換好晒滑雪衫著晒雪鞋，食完個早餐後CHECK OUT，叫民宿幫手(之前一日要通知，等人地可以安排啊)車團友過去赤倉間酒店(記得攞埋門口自己對鞋走啊)，放低行李寄存喺酒店(因為咁早未有得CHECK IN)，下午滑完雪先慢慢走去CHECK IN，至於晚餐問題呢…….呢到好啲有得選擇, 不過都係強烈建議早BOOK定位啊。

13 Mar 2019
本應唔駛今日離開雪場既，因為14號先飛走，不過班機好衰唔衰係下午3點幾起飛，變咗如果14號先走既話，要1點到機場計，搭車最快要用4.5小時，計返即係要8:30或者更早就要離開酒店去搭車，咁樣住多晚雪場都無意思啦，仲要有風險途中唔知有咩突發事件要再遲啲先去到機場，咁不如早一日走啦, 夜晚到東京食晚飯好過啦…..
言歸正轉，老規矩下午滑完雪返酒店，沖個涼換好晒衫，執埋行李, 準時5點酒店出發去妙高高原車站，再轉17:29信濃鐵道北信濃線去長野站，到站時間18:12，小休一陣轉搭19:03 JR北陸新幹線 はくたか514号去東京站，到站時間20:23，之後可以搭山手線去池袋間酒店checkin喇。

14 Mar 2019
起身喇!!!!!!有咁早得咁早起身喇, 你地團入面有人話要去成田間outlet行下喎, 幫你地度過喇, 朝早池袋出發既NEX呢, 得6:43同9:32之後仲有班10:33, 不過10:33嗰班車就唔駛去outlet架喇….因為無時間喇, 要行OUTLET自己睇路喇, 如果搭9:32班車, 要轉多次T2 11:25既Shuttle去outlet, 之後都仲有1小時10分鐘畀大家行街既, 行完之後要搭返12:50返成田機場Terminal 2，之後就去買手信等上機喇。。。A團完成

14 Mar 2019
由於太無時間Shopping喇, 所以圑友決定唔去outlet喇!!!!!!明智決定!!! 朝早池袋出發11:03 NEX 21號, 12:31到成田機場Terminal 2，之後就去買手信等上機喇。。。A團完成