攞住一大堆Snowboard Gear點樣係日本搭車最舒服!!!!!!!

攞住一大堆Snowboard Gear係日本東京搭車真係一件相當頭痛既事…講交通就一定要講咗酒店先,因為間酒店決定一切!!!!點解咁講呢?

 


係人都想搵到間平靚正既酒店啦,你要知道我呢啲Cheap精,住唔慣大酒店係都鍾意住啲酒店仔先安落,搵酒店唔能夠隨便搵,唔係話見間酒店又平又靚就Book得,真係要度過落咗電車之後要行幾多分鐘先到酒店呢,你知啦攞住差唔多40kg野,行多1分鐘都想死架…試過住過一間酒店,落咗JR要行差唔多45分鐘先到酒店…..果程路….我諗呢世都會記得… 又如果一行多人Book咗旅遊巴,咁酒店門口又停唔停到呢,如果停唔到又要行幾遠先得呢….等等….好多野要顧慮呢…
不過呢,依家多數都係滑完雪果日喺雪場叫服務台啲哥哥姐姐幫手寄啲板啊,鞋啊,頭盔啊,總之所有滑雪野去機場,到最後走果日去機場攞返就ok啦(記住預多半小時去攞呢堆野),價錢大約¥2,000咁上下啦,之後果幾日你就輕身上路,選酒店都唔駛咁麻煩。



夠人去(例如10幾20人),最好BOOK架大巴,雖然book一次好似好貴(萬幾蚊港紙),但係人多就其實差唔多,你搭程果啲乜春巴都要700-800啦, 新幹線仲要成千蚊添…….仲有啊,book咗架大巴,係巴士等你,唔係你等巴士,啲時間差好遠呢……要知道走轉日本滑雪每一分鐘都要成本,用錢買得到時間就要買架喇…..醒你計時間成本大法,我假設你去一次滑雪要用$12,000,去8日,條formula就係12000 / 8 / 24 / 60 = 1.041,換包話講,你係日本每人每分鐘成本要HKD1.041,你話成班人無啦啦要係到等一個鐘車,計一計…15個人就唔見成千蚊架喇…..


唔夠人去(例如3幾個),最好都係搭雪場shuttle bus,點解呢??啲人通常都話搭巴士要好耐時間架喎, 你又話咩成本大法乜乜乜….你玩我咩!!!!….咪閙住先…..首先,除咗時間成本,仲有樣野叫人工成本…..人工呢樣野就真係個個都唔同,有啲人時薪要一萬幾千,自己幾多時薪,自己計啦😌。
入返正題..搭巴士既好處係一程過,落機果刻開始你就要帶住咁多Gear週圍行(我有total 有30-40kg),如果搭新幹線呢….sor9ry,機場無新幹線去雪場喎。
即係你要搭唔知乜春線入咗市區先, 再轉車先搭到新幹線…哈, 以為搭到新幹線又完喇咩, 又sor9ry喎,你要再轉多程巴士先入到雪場喎…….過程中要行兩轉搵車搭,又要行去買車票,又要行去入閘機,又要放好行李,到落車喇, 又要去攞住行李行去出閘機,到轉車時又重複一次買車票入閘出閘…….整個過程你要照顧你個30~40kg野……….最重要係你重要等車囉,如果就唔啱時間, 可能要等你個幾鐘架……頂丫,你自己諗下做呢啲野人工要幾多錢丫,諗起都辛苦……
至於搭巴士呢…..落機,行去買野食,行去巴士站,放低行李上車……..訓…..醒,中途站痾尿,訓………醒…到…落車…完



不過咁,需然搭巴士係好好,不過啲巴士時間表…99%都係朝早先有車,如果你唔係搭零晨機都唔駛諗,至於搭唔搭零晨機既問題,就要你自己考慮下喇。😁
如果你唔想搭零晨機,又想搭巴士呢,仲有個方法既,就係入市區坐巴士喇,新宿有好多車去各大滑雪場,價錢仲要平好多,¥3,000內就攪掂,最重要係有晚車,搭程車訓醒就朝早入到雪場,慳返晚酒店錢架,不過就辛苦囉。😑

Leave a Reply

Your email address will not be published.